سوالف للجامعة تمنيت احد قالها لي + معلومات وخرائط لجامعة الاميرة نورة

الولادة واول يوم لك في الجامعة والوقوع في الحب وطعم الشاورما ، ما تقدر توصفه لشخص ما جربه 

اول نصيحة احب اقول لك : لا تسمع نصيحة احد :) حتى انا لو ما اعجبك بعض كلامي خذ منه ما يعجبك فقط ، لان احنا نملك عقول وكون هناك شخص جرب اللي ما جربناه لا يعني انه حكيم ومتباري مع الوحش ومختم الدنيا ، جرب واحكم بنفسك. 

رح اتكلم في هذه التدوينة البسيطة باختصار عن : 

(بعض النصائح اللي تمنيت احد نبهني عنها قبل لا ادخل الجامعة) 

بتكلم عن عدة نقاط مختصره للجامعة او الكليات بشكل عام ثم ندخل على جامعة الاميرة نورة بشكل خاص من خرائط واماكن وغيرها .

لكن قبل ذلك ما نبي تنتظرون مني موضوع او شغل احترافي ، رح اتكلم معكم مثل لما اتكلم مع بنت خالتي المستجدة بس الفرق اني ما اقدر اصككم بالبياله ان اعطتني كلام سلبي منقول من شخص اخر.

- الجزء الاول – 

  

*كل سنه غالباً انظمتها تختلف عن السنوات اللي راحت لذلك لا تبني قراراتك وحتى احكامك على تجاربهم بنسبة ١٠٠٪‏وايضاً يمكن الجهة التي تنظر انت منها 
مختلفه.

*الطلاب هوالين ، يبالغون ، يعشقون الطاقات السلبية وهذه معلومه وليست رأي .

*لو قررت تكون الجامعة افضل مرحلة في حياتك رح تكون .

*تقدر تغير تخصصك لو ما اعجبك ،انت مو شجره ولكن لاتختبر تخصصك هل
 هو بيثير اعجابك او لا ؟ انت ابحث عن المميز فيه لاثارة اعجابه .

*المعدل العالي مو مستحيل والكتب من صنع البشر .

*المراجعة اهم من المذاكرة وهذه المعلومه اهم معلومه في حياتي الجامعيه اكتشفتها متأخر .

*اكتب لك خطه كتب تقرئها باوقات فراغك او كتب صوتيه او برامج يوتيوب طبعا شرط خاص للبنات بحكم ان وقت الخروج هو نفسه وقت خروج الوزراء.

*تعلم انقلش ، وهاذي تحتها مليون خط .

*لايوجد علم لا يفيد رح تكتشف فوائده بعدين.

*التذمر ليس فضفضه انما اعتراف صريح منك على شيء ما ماودي اجرحكم والصراحه نسيت الكلمه المناسبه :)

ابي اقولك بس ، ان الجامعه هي افضل ايام حياتي ، انا استغرق للوصول اليها ساعه الى ساعتين لو كان زحمه ، لكن اقدر اخلي الطريق الطويل هذا +ماعندي سواق خاص مثلا او وسوء اخلاق السواق لحظات سيئة في حياتي ، لكنني ما ابي ، لاني ماني مستعده للتعاسه، فكان الطريق الطويل هذا سبب في حل بعض مشاكلي و اتخاذ قرارتي من خلال طقة الهاجوس وكان سبب في انه يروقني لو طلعت من البيت معصبه من شي ، كان سبب في انه عرفني على عدة كتب وروايات ، وقنوات يوتيوب وموسيقى جميله وقراءة مقالات ، انت تختار طريقك مو هو يختارك ، كنت اضع سماعتي لسماع كتاب صوتي وكان يدخل صوت اخر مع صوت القارئه وهو صوت الفتاة اللي جنبي تتأفأف ورأس فتاة بيساري نامت على كتفي بالغلط . 

كان الطريق الطويل هو سبب اني اعرف تخصص القانون وانه موجود في جامعتنا من خلال خلق احاديث جميلة مع شخص غريب في السياره ، لاني انا من ابتسم وبادر بالحديث ، لم ينتظر احد .

صح اني ساكته في الفتره الحاليه بس لاني اكبر من في السياره كل شي عرفته مايحتاج هههه
الخلاصه في الموضوع ، هو انك تستطيع خلق الجو الذي تريده بنفسك . 

ابيك تعرفين ان الصداقه امر والدراسه امر اخر ، وان مرحلة الجامعه هي من ستنصف اصدقائك وستقرر انتي مين بالضبط؟ رح تكتشفين من اصر على التواصل معك رغم انشغالكم ورح تعرفين من يهتم لمصلحتك منهم ومن يهتم في انك تسحبين على المحاضره عشان يستغل وقته هو . لذلك انتبهي لمصلحتك ولا تنشغلين بالعلاقات 

انتبهي ! حضور المحاضرات امر مهم جداً حتى لو كانت اساله الاختبار تجي مختلفة تماما، تعلمي من المحاضرات معلومات جديده ، اكتبي ما يثير اهتمامك على هامش الكتاب لتبحثين عنه بعدين ، ابحثي عن نفسك من خلال تعليمك عشان مستقبلا تعرفين وين طريقك فيه ،

 السؤال مو عيب ولو تفشلتي مره مرتين وضحكوا عليك ، العلم امر لا يجب الخجل منه ، كلنا لا نولد من بطون امهاتنا متعلمين ، احصلي على درجاتك وتعليمك بشرف ، اطلعي من الجامعه وانتي فخوره باخلاقك قبل شهادتك ، لانك ماسمحتي لنفسك بأخذ درجه لا تستحقينها ولا احتجتي للتميلح او الكذب ، رح اضع امر المفترض اني ما اضعه لكني اشوف فيكم نفسي ولا ارضى اشوف احد غلب على قلبه اليأس حتى لو كنت في السفينة ما ارضى اشوف احد يغرق ، بعطيكم صوره لدرجاتي في اول حياتي الجامعية وصوره لنهايتها وانتم احكموا ، لكن قبل ذلك ترا الدرجات مو كل شي اقدر اعبي راسي معلومات ثم افرغه في الورقه واطلع برأس فارغ انا في بداية حياتي الجامعة كنت اسمع ان الاي بلس مستحيل وان الدكتور لا يرضى ذلك ، وكانت طريقتي في المذاكره جامده لاتتغير وكنت اركز على المذاكره واستغرق وقت طويل ولا احفظ وقت للمراجعه لو بس كنت اعرف انه شي ممكن فقط وقررته لحصلت عليه بدون ما استغرق كل هذا الوقت في الاكتشاف ، ترا الناس تشاركك الفشل والامور السلبيه اما نجاحاتهم الصغيره نادرا ما يشاركونها ، لذلك تعتقد ان السائد هو الفشل 

وبعد ! اسمحي لنفسك بالتعلم من اخطائك ، اذا ماتذكرتي الاجابه اثناء الاختبار غيري طريقة مذاكرتك ، اذا كانت المذاكره ثقل على قلبك ايضا غيريها . طريقتك في المذاكره ماتشبه طريقة غيرك ، يمكن ينفعك معك مراجعه وحده فقط لكن غيرك مايحل الا بعد اربع مراجعات .
 لا تجمعين كلاسين ورا بعض وانتي مافهمتي شي ، الدروس تتراكم ، 
ولما تحلين حلي بشرف مثل ماقلت وحلي حل يليق فيك لاتتحولين آله غير شغوفه بتخصصها تفرغ ما استذكرته على ورقه ، ترا انتي الخسرانه . 

استغلي مرحله البكالوريوس ووجود العديد من الدكاتره والاساتذه حولك في القسم ، اسألي اي سؤال يخطر في ذهنك عن التخصص ، والمستقبل او ماذا فعلو في مسيرتهم هم .
ومثل ماقلت السؤال مو عيب وبالعكس يمكن يلهمك امر ما . 

نظمي وقتك واقتني دفتر تقويم وهناك اقتراحات ايضا ، ولو عندك اقتراح شاركني فيه من خلال التعليق اسفل الوضوع 

متجر عين بالانستقرام 

http://instagram.com/aienshop_nbks

دفاتر في سنتر بوينت او امازون 

او تقويم من المبدعه نوره 

https://twitter.com/shmookhnoura/status/905467779716964352

اخسري مره مرتين وثلاث ، عادي يختي تغمغمي بطرحتك وصيحي ، لكن لاتتوقفين ، من فضلك وانا اطلبها منك شخصياً ، نريد نساء حقيقيات لهذا الوطن .. 

مو نسمع ان الحياة صعبه وتحتاج صبر ومجازفه وخسائر ، تفضلي جربيها ..

 - الجزء الثاني -

عشان نكون بالصوره ، جامعة نوره مبنية على جبل ، يعني اول ماتدخلين رح ترقين درج ، اشوفه موضوع مثير للاهتمام مدري ليه انا الوحيده المبسوطه اني ادرس فوق جبل

تخيلي خريطه الجامعة على شكل مستطيل ، ومباني متقابله  (المحطات) تبدا ب A مثلا A1 A2 .. لحد A10 وقدام كل محطه مبنين ( كليات) يعني كليتين 

محطه من واحد الى خمسه جنب بعض ، ومن سته الى عشره جنب بعض

محطه ٢ بعيده جدا عن ٣ تقريباً ٣٠ دقيقه مشي ، وA9 المكتبة المركزيه فيها ستار بكس وقدامها مسطح اخضر حلو بالشتاء مرات يكشتون فيه . وفيها المسرح الكبير ومعرض الكتاب ومكتبة تتصفحين وتقراين جميع انواع الكتب

وفيه محطات فرعيه مثل  ,F1 العماده . والعماده هي المكان اللي نقدر نغير فيه 
جدولنا ونحل فيه بعض المشاكل الجامعيه وs1 نادي رياضي 

وقدام كل محطه ( A) جناح بالجهة المقابله من الخلف ، وهدفه منعاً من الزحمه اثناء ماتدخلين الجامعة لانها بشارع مقابل للمحطه ، جناح ٣ هو عباره عن حضانة اطفال و جنبة مركز دعم وتطوير الاعمال

محطه ٤ في الكليه اليمنى هي مو كلية ( استثناء) هاذي خدمات الطالب فيها مطاعم وكفيات وصيدليه ومكتبه ومشغل وعياده وتقام فيها فعاليات وفيها مسرح خاص فيها .

لازم تعرفين كل كلية قدامها اي محطه ؟ ، كذا تعرفين تنزلين لها من الشارع او تبين تعرفين كليتك؟ او لو مثلا حضرتي دوره في كليه معينه 

محطه الباصات A2  طبعا الباصات الخاصه اللي هي شركه اما باصات الحكومة اتوقع A4 بس افضل لك دوري لك باص يوصل للكلية نفسها اسأليه قولي توصل للكية او 2 ؟ ان قال 2 انحاشي 
A2 يكون الخروج منالجناح مو المحطة الاساسيه هاذي نقطه مهمه لو كنتي بشركه الخروج والدخول من الجناح حق محطه ٢وليس محطه ٢نفسها 
ولان محطه ثنين بعيده لها مبنى خاص فيها مطاعم وهو قسم خاص للصحي

المترو الدخول والخروج له من المحطة نفسها (A) الدور الثاني ، لازم تنتبهين ان في كل محطه جهتين جهة مترو لو ركبتيه رحتي يمين 

وجهة تروحين يسار .

 انتبهي قبل لا تتجهين للجهة وترقين فوق فيه لوحه مكتوب هالجهة وين تودي ، وانتي احفظيها الباب القريب من الكليه هو الجهة اللي بعد ! 

هنا بعد ماترقين الدرج 

 هنا تحت ، لاحظي يمين الصوره فوق الشاشه مكتوب لاي جهة يودي المترو. هذا يعني باختصار بكل محطه جهتين جهة بعد وجهة قبل ، شوفي الشاشات عشان تفرقين .

بنك الرياض موجود في ٢ و ٤ والصرافات في ٦ و ٣ و ٤ خدمات .

في كل كليه كفيتيريا وكل دور فيه مصلى ، ويعض الكفايتريا مميزه زي كافيتريا تصاميم وفنون فيها تورتا ، وفي كل كليه فيها مكتبه خاصه لكتب التخصص لكن محدوده ومكان للمذاكره ،تراهم مو مسؤلين عن اغراضك لكن بنفس الوقت يطالبونك بنزعها عند الباب !! كيف مدري ؟ لذلك خذي ممتلكاتك الثمينة معك بيدك . وبخصوص الممتلكات الثمينة ان شاءالله تسوي رجيم 

في محطه ٤ مكان للمفقودات جنب البنك ، لو ضاع منك شي روحي لهم بكره ، لان مفقودات كل كليه تجمع من خلال فتيات الامن وترسل لهم 

وفي ٤ جهة اداره خاصه بفتح مشاريع تجاريه للطالبات مثل مشروع 
( محابر ) او لو حابه تسوين اعلان وتتعاقدين مع الجامعة روحي لاربعه . وفيه مشروع توصيل نسيت اسمه اتوقع ( وصل ) لو تبين ملزمه او شي من اربعه وانتي بعيده دقي عليهم يوصلون لك

فيه جهة اخصائين نفسيين لكن نسيت وينها هههه اظن ٣ بالجناح 

وبخصوص المعلومات في الجدول رح تظهر لك ارقام مجهوله تفضلي شوفي معناها 

ومرات يكون بجانب رقم القاعه حرف ، طبيعي ممكن اسمها رقم وحرف ، ومرات مايظهر لك طبيعي لانه مابعد تحدد . كررت طبيعي لاننا نسوي دراما شوي بالبدايه

• بطاقات الشحن تباع في المشين وفي ٤ البقاله فوق وبعض العاملات يبيعونها بطريقه غير شرعيه 
• الفوط الصحية تلقينها في السوبر ماركت فوق او في الصيدليه انصحك بالسوبر ماركت الحبه بريال 
• ممنوع تلبسين العبايه لكن اعتقد تساهلو بالموضوع بس انصحك تشيلينها بالكلاس لان بعض الدكاتره الموضوع عندهم حساس
• بعض الاحيان يعلون على المكيف بشكل خيالي ، جيبي بلوفر احتياط 
• وبخصوص اللبس انصحك ماتشترين شي شوفي اول اسبوع وش تتوقعين     يناسبك سواء شنطه او بلايز
• نشتري الكتب من مكتبة في اربعه - خدمات الطالب وكل تخصص عندهم   مكتبة برا تتميز في تخصصهم يعني 

   - جيبي معك صرف فلوس لان المكاين ماترجع الباقي 

     لاتنسين بطاقتك وصوريها بجوالك احتياط ، لو نسيتيها لاتدخلين من                محطه ٤ الامن هناك يستقعدون 

     -الفيش ثلاثي 

   - الانترنت الخانه الاولى رقمك الجامعي الخانه الثانيه الرقم  السري                لباسووردك لايميل الجامعة ، اسم الشبكه ستيودنت

    -اشوف ان شركة زين افضل شركة للجامعة بس بعض البنات يشوفون اس        تي سي 

     -لو ضاعت عبايتك استعيني بالعاملات

     -شؤن الطالبات في كل كليه هم المسؤولين عن الجداول وعن اللوكرات             وعن كل امر يخصك

      اللوكر اظن ينتهي دوامهم ٢ لذلك احرصي تطلعين اغراضك قبل لان               لو خرب بيصير مافيه موظفات له 

     -اعرفي مين هي مرشدتك الجامعيه واحفظي ايميلها احتياط ، وبتعرفينها       من خلال الموقع يطلع لك اسمها هي المسؤله عن جدولك واستفساراتك وغيرها .. 

      -مسموح تي شيرت ، وتنانير اسود ودرجات الرمادي ، الشفاف يكتبونا تعهد عليه ، والتنانير القصيره كذلك ، اما بنات الصحي فعندهم الوان خاصه فيهم ولبس خاص 

 تاكسي لندن في محطه A1 لكنه غالي جدا وكريم واوبر سمعت انه مننوع بس 
اطلعي لحد يدري :) ّ . 

يفتح الباب الساعة ١٢ ومرات ١١ لان لو طلعتي قبل كذا تكون                اخلاقك مشبوهه مدري شهالغباء امسحوها بوجهي ولو طلعتي وماجا السواق ورجعتي بيمسكونك ويسوون سالفه لذلك انطقي برا بالشمس او نبهي السواق مايدق لحد مايجي

ان كان جدولك تطلعين قبل ١٢ كل يوم تقدرين من خلال شؤن الطالبات تطلعين 
تصريح تبينين فيه انك تطلعين قبل روحي اساليهم وش متطلبات التصريح طبعا لازم سواق باقامتكم واتوقع ولي الامر بعد ويمكن ابو الجيران والملك سلمان

حالات الوفاة خذي موافقه من رئيسة قسمكم للخروج او روحي للسكرتاريه

  -عندنا نادي رياضي التسجيل ب ١٠٠للشهر كل بداية شهر،النادي رائع فعالياته جميله فيه كره طائره وكلاسات رقص والمدربات فيه من جنسيات مختلفه ومتخصصين

-هناك نوادي لو يهمك الموضوع مثل نادي الحوار ونادي اللغات وغيرها مثل اللغة الكوريه ، في كل ترم في اربعه اعتقد فيه معرض للتعريف عن       النوادي والتسجيل ولهم حسابات تويتر 

في كل تخصص لهم نادي خاص فيهم بطريقة التطوع وتقدرين انتي تخصصك انقلش تشاركين في نادي القانون ، واعتقد ان الدراسه اهم من لنوادي من وجهة 
نظري لذلك لاتستعجلين فيهم من اول ترم شوفي وضعك اول ، يعني شخصيا من اول ترم متحمسه لهم وماقدرت اسجل . 

لكن بالمقابل انشأنا تبع نادي القانون ( نادي قنديل) لنشر الوعي قانوني بين طلاب 
المدارس والجهات ، يعني المجال مفتوح لاجتهادات الطالبات لكن اختاري دكتوره 
كويسه تتبناكم وتشرف عليكم

هاذي لوائح الجامعه لان لا عذر لجاهل في القانون .

http://www.pnu.edu.sa/arr/University/Pages/Rules.aspx

وفي الموقع مثل اي جامعه بامكانك الحصول على برامج ويندوز مجانا 

لو كان هناك معلومات اضافيه او معلومه اخطأت فيها تفضلو اطرحوها بالتعليقات ، اتمنى لكم حياة جامعية ممتعه تكتشفون فيها انفسكم قبل ماتكتشفون شي اخر.
 وصدقوني عدم القبول بالجامعه لا يعني نهايه الحياة ، مو كلنا حياتنا واقدارنا متشابهه والنجاح ماهو جامعهولك في ستيف جوبز خير مثال . الحمدلله على وجود السوشل ميديا وكيف اختصر لنا المسافات والتعليم تخيل انك في منزلك وتحضر دوره لجامعة هاردفرد ومجانيه بعد .. 

انا سديم ، في اخر مرحلة جامعيه لي ، الايام تركض ، تمنى لي التوفيق فأنا لم اجد طريقي الصحيح بعد .. هو وجدني بس قاعد يتفرج علي ويضحك على تخبطاتي 
إليه . 

---

بعض الصور تصويري وبعضها قوقل

تشرفني تعليقاتكم  

5